ഓമശ്ശേരി:
പഞ്ചായത്ത്‌ ഭരണസമിതി 121 അതിദരിദ്ര കുടുംബങ്ങൾക്ക്‌ ആയിരം രൂപയുടെ ഓണക്കിറ്റുകൾ വിതരണം ചെയ്തു.അരി,വെളിച്ചെണ്ണ,പഞ്ചസാര,കടല,ചെറു പയർ,കഞ്ഞി അരി,പായസം മിക്സ്‌,പരിപ്പ്‌,ചായപ്പൊടി,സോപ്പ്‌ ഉൾപ്പടെ പത്തിനങ്ങളടങ്ങിയ കിറ്റാണ്‌ നൽകിയത്‌.ഒരു ലക്ഷത്തി ഇരുപത്തി ഒന്നായിരം രൂപ തനതു ഫണ്ടിൽ നിന്ന് വകയിരുത്തിയാണ്‌ ഓമശ്ശേരി ഗ്രാമപഞ്ചായത്ത്‌ മാതൃകാ പ്രവർത്തനം കാഴ്ച്ച വെച്ചത്‌.പഞ്ചായത്തിലെ 19 വാർഡുകളിൽ നിന്ന് നിരവധി അന്വേഷണ പ്രക്രിയകളിലൂടെയാണ്‌ 121 കുടുംബങ്ങളെ അതിദരിദ്രരായി കണ്ടെത്തിയത്‌.ഇവരുടെ ഉന്നമനത്തിനും പുരോഗതിക്കുമായി ഗ്രാമപഞ്ചായത്തിന്റെ നേതൃത്വത്തിൽ വിവിധങ്ങളായ പദ്ധതികളാണ്‌ ആസൂത്രണം ചെയ്ത്‌ നടപ്പിൽ വരുത്തുന്നത്‌.
അതിദരിദ്രരിലെ 27 കുടുംബങ്ങൾക്ക്‌ വീടിന്‌ 4 ലക്ഷം രൂപ വീതം 1 കോടി 8 ലക്ഷം രൂപ ഫണ്ടനുവദിച്ചിട്ടുണ്ട്‌.ഇതിൽ 18 വീടുകളുടെ നിർമ്മാണം പൂർത്തിയായി.9 വീടുകളുടെ നിർമ്മാണ പ്രവർത്തനങ്ങൾ പുരോഗമിക്കുകയാണ്‌.4 കുടുംബങ്ങൾക്ക്‌ വീട്‌ വെക്കാനുള്ള സ്ഥലവും പഞ്ചായത്തിന്റെ നേതൃത്വത്തിൽ സജ്ജീകരിച്ചിട്ടുണ്ട്‌.3 കുടുംബങ്ങൾക്കുള്ള സ്ഥലത്തിനുള്ള 7.50 ലക്ഷം രൂപ കെ.ചിറ്റിലപ്പിള്ളി ഫൗണ്ടേഷനാണ്‌ നൽകിയത്‌.ഒരു കുടുംബത്തിന്‌ പഞ്ചായത്ത്‌ ഫണ്ട്‌ ഉപയോഗിച്ചാണ്‌ സ്ഥലം കണ്ടെത്തിയത്‌.7.50 ലക്ഷം രൂപ ചെലവഴിച്ച്‌ ഇതിനകം 14 അതിദരിദ്രരുടെ വീടുകൾ പുനരുദ്ധരിച്ചു.വിദ്യാർത്ഥികളുള്ള പട്ടികജാതി വിഭാഗത്തിലെ ഒരു അതിദരിദ്ര കുടുംബത്തിന്‌ 2 ലക്ഷം രൂപ വിനിയോഗിച്ച്‌ പഠന മുറിയും പൂർത്തീകരിച്ചിട്ടുണ്ട്‌.ചികിൽസാ-സഹായ പാക്കേജുകളും അതിദരിദ്രർക്കായി ഓമശ്ശേരി ഗ്രാമപഞ്ചായത്ത്‌ സംവിധാനിച്ചിട്ടുണ്ട്‌.
പഞ്ചായത്ത്‌ ഹാളിൽ നടന്ന ചടങ്ങിൽ പഞ്ചായത്ത്‌ പ്രസിഡണ്ട്‌ കെ.കരുണാകരൻ മാസ്റ്റർ ഓണക്കിറ്റിന്റെ വിതരണോൽഘാടനം നിർവ്വഹിച്ചു.വൈസ്‌ പ്രസിഡണ്ട്‌ ഫാത്വിമ അബു അദ്ധ്യക്ഷത വഹിച്ചു.വികസന സ്റ്റാന്റിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി,ആരോഗ്യ-വിദ്യാഭ്യാസ സ്റ്റാന്റിംഗ്‌ കമ്മിറ്റി ചെയർമാൻ പി.കെ.ഗംഗാധരൻ,ക്ഷേമകാര്യ സ്റ്റാന്റിംഗ്‌ കമ്മിറ്റി ചെയർപേഴ്സൺ സീനത്ത്‌ തട്ടാഞ്ചേരി,പഞ്ചായത്തംഗങ്ങളായ പി.അബ്ദുൽ നാസർ,എം.എം.രാധാമാമണി ടീച്ചർ,എം.ഷീജ ബാബു,സി.എ.ആയിഷ ടീച്ചർ,ഇബ്രാഹീം ഹാജി പാറങ്ങോട്ടിൽ,കെ.ആനന്ദകൃഷ്ണൻ,ബീന പത്മദാസ്‌,എം.ഷീല,പഞ്ചായത്ത്‌ സെക്രട്ടറി കെ.ഗിരീഷ്‌ കുമാർ,അസിസ്റ്റന്റ്‌ സെക്രട്ടറി പി.ബ്രജീഷ്‌ കുമാർ എന്നിവർ സംസാരിച്ചു.
ഫോട്ടോ:ഓമശ്ശേരിയിൽ അതിദരിദ്രർക്കുള്ള ഓണക്കിറ്റുകളുടെ വിതരണോൽഘാടനം പഞ്ചായത്ത്‌ പ്രസിഡണ്ട്‌ കെ.കരുണാകരൻ മാസ്റ്റർ നിർവ്വഹിക്കുന്നു.
إرسال تعليق