ഓമശ്ശേരിയിൽ തൊഴിൽസഭകൾക്ക്‌ തുടക്കമായി.

ഓമശ്ശേരി:ഓമശ്ശേരി പഞ്ചായത്തിൽ തൊഴിൽ സഭകൾക്ക്‌ തുടക്കമായി.യുവതലമുറയെ തൊഴിലിലേക്കും സംരംഭങ്ങളിലേക്കും വഴികാട്ടാനായി പഞ്ചായത്തിന്റെ നേതൃത്വത്തിലാണ്‌ തൊഴിൽ സഭകൾ സംഘടിപ്പിക്കുന്നത്‌.തൊഴിൽ സഭയുടെ പഞ്ചായത്ത്‌ തല ഉൽഘാടനം ഓമശ്ശേരി കമ്മ്യൂണിറ്റി ഹാളിൽ പഞ്ചായത്ത്‌ വികസന സ്ഥിരം സമിതി അദ്ധ്യക്ഷൻ യൂനുസ്‌ അമ്പലക്കണ്ടി നിർവ്വഹിച്ചു.ആരോഗ്യ-വിദ്യാഭ്യാസ സ്ഥിരം സമിതി അദ്ധ്യക്ഷൻ സൈനുദ്ദീൻ കൊളത്തക്കര അദ്ധ്യക്ഷത വഹിച്ചു.

ക്ഷേമകാര്യ സ്ഥിരം സമിതി അദ്ധ്യക്ഷ ഒ.പി.സുഹറ സ്വാഗതം പറഞ്ഞു.പഞ്ചായത്ത്‌ മുൻ വൈസ്‌ പ്രസിഡണ്ട്‌ എം.എം.രാധാമണി ടീച്ചർ,മെമ്പർമാരായ കെ.കരുണാകരൻ മാസ്റ്റർ,പി.കെ.ഗംഗാധരൻ,സി.എ.ആയിഷ ടീച്ചർ,ഫാത്വിമ അബു,അശോകൻ പുനത്തിൽ,പി.ഇബ്രാഹീം ഹാജി,സീനത്ത്‌ തട്ടാഞ്ചേരി,എം.ഷീല എന്നിവർ സംസാരിച്ചു.കില റിസോഴ്സ്‌ പേഴ്സൺ പി.കെ.രാധാകൃഷ്ണൻ മാസ്റ്റർ ക്ലാസ്സിന്‌ നേതൃത്വം നൽകി.വ്യവസായ വകുപ്പ്‌ ഇന്റേൺ എം.ശ്വേത ചർച്ച നയിച്ചു.

ഒന്നു മുതൽ എട്ട്‌ വരെയുള്ള വാർഡുകളുടെ തൊഴിൽ സഭകളാണ്‌ ആദ്യ ദിനത്തിൽ രണ്ട്‌ സെഷനുകളായി നടന്നത്‌.നോളജ്‌ ഇക്കണോമി മിഷന്റെ നേതൃത്വത്തിൽ കുടുംബശ്രീ നടത്തിയ തൊഴിൽ സർവ്വേയിലൂടെ തൊഴിലിനു വേണ്ടി രജിസ്റ്റർ ചെയ്തവർ,ജോലി തേടുന്ന മറ്റുള്ളവർ,സ്വയം തൊഴിൽ സംരംഭകർ,തൊഴിൽ ദായക സംരംഭകർ,സംരംഭ പുനരുജ്ജീവനം ആവശ്യമുള്ളവർ,സംരംഭകത്വ മികവ്‌ വർദ്ധിപ്പിക്കാൻ ആഗ്രഹിക്കുന്നവർ,നൈപുണ്യ വികസനം ആവശ്യമുള്ളവർ തുടങ്ങിയവർ തൊഴിൽ സഭകളിൽ പങ്കെടുത്തു.9,10,11,12 വാർഡുകളുടെ തൊഴിൽ സഭ നാളെ(ചൊവ്വ) രാവിലെ 10.30നും 13,14,15,16 വാർഡുകളിലെ തൊഴിൽ സഭ ഉച്ചക്ക്‌ 2 മണിക്കും 17,18,19 വർഡുകളിലെ തൊഴിൽ സഭ ബുധനാഴ്ച്ച കാലത്ത്‌ 10.30 നും കമ്മ്യൂണിറ്റി ഹാളിൽ നടക്കും.

തൊഴിലന്വേഷകരെ തിരിച്ചറിയുകയും അനുയോജ്യമായ തൊഴിൽ സാധ്യതകൾ കണ്ടെത്തുകയും രാജ്യത്തിനകത്തും പുറത്തുമുള്ള തൊഴിലുകളിലേക്ക് അവരെ നയിക്കുകയുമാണ് തൊഴിൽസഭകളിലൂടെ ലക്ഷ്യമിടുന്നത്.പതിനെട്ട് വയസ്സിനും അന്‍പത്തൊമ്പത്‌ വയസ്സിനുമിടയിലുള്ള  തൊഴിലന്വേഷിക്കുന്നവർക്ക്‌ തൊഴില്‍-സംരംഭ സാധ്യതകള്‍ മനസിലാക്കുന്നതിനും ചര്‍ച്ചചെയ്യുന്നതിനും സര്‍ക്കാര്‍ സംവിധാനങ്ങളുമായി ഇവരെ ബന്ധപ്പെടുത്തുന്നതിനുമുള്ള ജനകീയ ഇടവും ഇടപെടലുമാണ്‌ തൊഴില്‍ സഭകൾ.പ്രാദേശിക സംരംഭങ്ങളും തൊഴിൽ സാധ്യതകളും  കണ്ടെത്തിക്കൊണ്ട് തൊഴിലന്വേഷകരുടെ കഴിവുകൾ മെച്ചപ്പെടുത്തുന്നതിനും നൈപുണ്യ വികസനം തൊഴിലിന് കൂടുതൽ അനുയോജ്യമാക്കുന്നതിനുള്ള പ്രവര്‍ത്തനങ്ങള്‍ ആസൂത്രണം ചെയ്യുന്നതിനും തൊഴിൽസഭകൾ പ്രാമുഖ്യം നൽകുന്നുണ്ട്‌.ഇതിനായി  തൊഴിൽസഭകളിൽ തൊഴിൽ- സംരംഭക  ക്ലബ്ബുകൾ രൂപീകരിക്കുകയും തൊഴിലും വരുമാനവും തേടുന്നതിനുള്ള പുതിയ കൂട്ടായ്മകൾ സൃഷ്ടിക്കുകയും ചെയ്യും.വ്യത്യസ്ത വകുപ്പുകളുടെയും ഏജൻസികളുടെയും പ്രവർത്തനങ്ങളെ തദ്ദേശ സ്വയം ഭരണ സ്ഥാപന തലത്തിൽ ഏകോപിപ്പിച്ചുകൊണ്ട് സർക്കാർ സംവിധാനങ്ങളുടെയും സ്വകാര്യ മേഖലകളുടെയും സഹായം തൊഴിൽ അന്വേഷകരിലേക്ക് നേരിട്ടെത്തിക്കുക എന്നതും തൊഴിൽ സഭയുടെ പ്രധാന ലക്ഷ്യമാണ്.

ഫോട്ടോ:തൊഴിൽ സഭകളുടെ ഓമശ്ശേരി പഞ്ചായത്ത്‌ തല ഉൽഘാടനം ഓമശ്ശേരിയിൽ പഞ്ചായത്ത്‌ വികസന സ്ഥിരം സമിതി അദ്ധ്യക്ഷൻ യൂനുസ്‌ അമ്പലക്കണ്ടി നിർവ്വഹിക്കുന്നു.