വേനപ്പാറ ഹോളി ഫാമിലി ഹൈസ്കൂളിലെ വിദ്യാർത്ഥികൾ പരിസ്ഥിതി ആഘാത പഠനപദ്ധതിയുടെ ഭാഗമായി പഞ്ചായത്ത് വികസന സ്റ്റാന്റിംഗ്‌ കമ്മിറ്റി ചെയർമാൻ യൂനുസ് അമ്പലക്കണ്ടിക്ക്‌ നിവേദനം കൈമാറുന്നു.
ഓമശ്ശേരി:
വേനപ്പാറ ഹോളി ഫാമിലി ഹൈസ്കൂളിലെ വിദ്യാർത്ഥികൾ പരിസ്ഥിതി ആഘാത പഠനപദ്ധതി ആരംഭിച്ചു.ഓമശ്ശേരി പഞ്ചായത്തിൽ പ്രവർത്തിക്കുന്ന കരിങ്കൽക്വാറിയുടെ പരിസര പ്രദേശങ്ങളിൽ ഖനനം മൂലം വന്നു ചേർന്നിട്ടുള്ള മാറ്റങ്ങളെക്കുറിച്ച് പഠനം നടത്തുകയാണവർ.ഖനനത്തിനു മുമ്പ് ഉണ്ടായിരുന്ന ചുറ്റുപാടുകളല്ല ഇപ്പോഴുള്ളത്.
സമീപ പ്രദേശങ്ങളിലെ വീടുകൾക്ക് വിള്ളലുകൾ വീണിരിക്കുന്നതായും പല തരം പക്ഷികൾ,ജീവിവർഗ്ഗങ്ങൾ,ചെറുസസ്യങ്ങൾ,മണ്ണിന്റെ ഫലപുഷ്ടി എന്നിവ ഇല്ലാതായിരിക്കുന്നതായും സമീപവാസികളുമായി നടത്തിയ അഭിമുഖത്തിലൂടെ കുട്ടികൾ കണ്ടെത്തിയിട്ടുണ്ട്.
ഇത്തരം ഖനനപ്രവർത്തനങ്ങൾ മനുഷ്യർക്കും മറ്റു ജീവജാലങ്ങൾക്കും ദോഷകരമല്ലാത്ത രീതിയിൽ നടപ്പിലാക്കാൻ ആവശ്യമായ ഇടപെടലുകളുണ്ടാകണമെന്ന് ആവശ്യപ്പെട്ട്‌ നല്ലപാഠം,സ്കൗട്ട്,ഗൈഡ്സ് എന്നീ ക്ലബ്ബുകൾ സഹകരിച്ച് നൂറിലേറെ വിദ്യാർത്ഥികൾ ഒപ്പിട്ട നിവേദനം ഓമശ്ശേരി പഞ്ചായത്ത് ഭരണസമിതിക്ക് സമർപ്പിച്ചു.
പഞ്ചായത്ത് വികസന സ്റ്റാന്റിംഗ്‌ കമ്മറ്റി ചെയർമാൻ യൂനുസ് അമ്പലക്കണ്ടി കുട്ടികളിൽ നിന്ന് നിവേദനം സ്വീകരിച്ചു.നല്ലപാഠം കോ ഓർഡിനേറ്റർ സിമി ഗർവ്വാസിസ്,സിബില മാത്യൂസ്,മേരി ഷൈല, ആരതി പ്രദീപ്,നിദ ഫാത്തിമ,ഷംന റിസ് വാന,ഫാത്വിമ ലുബാബ,വി.എം.അബിൻ,ആദിത്ത്,അഫ് ലഹ്,ശ്രീഹരി,എം.കെ.അഭിനവ്,അജയ് രാജ്‌ തുടങ്ങിയവർ സംസാരിച്ചു.
Post a Comment