ഓമശ്ശേരി: പഞ്ചായത്ത്‌ ഭരണസമിതി 2023-24 വാർഷിക പദ്ധതിയിലുൾപ്പെടുത്തി വെളിമണ്ണ ഗവ:യു.പി.സ്കൂളിൽ സംഘടിപ്പിച്ച ഭിന്നശേഷി കലോൽസവം (ആരവം-23)ആവേശമായി.പഞ്ചായത്തിലെ 19 വാർഡുകളിൽ നിന്നുള്ള നൂറിൽ പരം ദിവ്യാംഗർ പങ്കെടുത്ത ഏകദിന കലോൽസവം ഹൃദയസ്പർശിയായിരുന്നു.വ്യക്തിഗത ഇനങ്ങളും ഗ്രൂപ്പ്‌ പരിപാടികളുമായി സർഗ്ഗവസന്തം വിരിഞ്ഞ ഒരു പകൽ നവ്യാനുഭവമായി മാറി.ആടിയും പാടിയും മണവാളനായും മണവാട്ടിയായും വിദ്യാർത്ഥികളും മുതിർന്നവരും അരങ്ങ്‌ തകർത്തപ്പോൾ കാണികൾക്കത്‌ വിസ്മയമായി.ജനപ്രതിനിധികളും രക്ഷിതാക്കളും അങ്കണവാടി അധ്യാപികമാരും ഹെൽപർമാരും നാട്ടുകാരുമുൾപ്പടെ നൂറുകണക്കിനാളുകൾ തിങ്ങി നിറഞ്ഞ ശ്രോതാക്കളിൽ പുതുമയും ആവേശവും വിതറുന്നതായിരുന്നു ഭിന്നശേഷി കലോൽസവം.ഒപ്പനയും ഡാൻസും ആംഗ്യപ്പാട്ടുകളുമുൾപ്പടെയുള്ള കലാപരിപാടികളൊക്കെയും നിറഞ്ഞ കയ്യടികളോടെയാണ്‌ സദസ്സ്‌ വരവേറ്റത്‌.അങ്കണവാടി വർക്കർമാരുടെ കലാപരിപാടികളും ഭിന്നശേഷി കലോൽസവത്തിന്‌ കൊഴുപ്പേകി.
രാവിലെ പഞ്ചായത്ത്‌ പ്രസിഡണ്ട്‌ പി.അബ്ദുൽ നാസർ ഉൽഘാടനം ചെയ്തു.വികസന സ്റ്റാന്റിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി അദ്ധ്യക്ഷത വഹിച്ചു.ക്ഷേമകാര്യ സ്റ്റാന്റിംഗ്‌ കമ്മിറ്റി ചെയർപേഴ്സൺ സീനത്ത്‌ തട്ടാഞ്ചേരി സ്വാഗതം പറഞ്ഞു.ആരോഗ്യ-വിദ്യാഭ്യാസ സ്റ്റാന്റിംഗ്‌ കമ്മിറ്റി ചെയർമാൻ കെ.കരുണാകരൻ മാസ്റ്റർ,പഞ്ചായത്ത്‌ സെക്രട്ടറി എം.പി.മുഹമ്മദ്‌ ലുഖ്മാൻ,ഐ.സി.ഡി.എസ്‌.സൂപ്പർ വൈസർ വി.എം.രമാദേവി,ബ്ലോക്‌ പഞ്ചായത്തംഗം ടി.മഹ്‌റൂഫ്‌,പഞ്ചായത്തംഗങ്ങളായ സൈനുദ്ദീൻ കൊളത്തക്കര,ഒ.പി.സുഹറ,പി.കെ.ഗംഗാധരൻ,എം.ഷീജ ബാബു,സി.എ.ആയിഷ ടീച്ചർ,അശോകൻ പുനത്തിൽ,മൂസ നെടിയേടത്ത്‌,ഇബ്രാഹീം ഹാജി പാറങ്ങോട്ടിൽ,എം.ഷീല,ഡി.ഉഷാദേവി ടീച്ചർ,'പരിവാർ'പഞ്ചായത്ത്‌ ജന.സെക്രട്ടറി കെ.അബ്ദുൽ ലത്വീഫ് ഓമശ്ശേരി,യു.പി.അബ്ദുൽ ഖാദർ മാസ്റ്റർ,കെ.ഇബ്രാഹീം മാസ്റ്റർ,സി.കെ.അബ്ദുൽ ജബ്ബാർ,എ.കെ.യൂസുഫ്‌,സ്പെഷ്യൽ എജ്യുക്കേറ്റർ സക്കീന ടീച്ചർ എന്നിവർ സംസാരിച്ചു.
വൈകുന്നേരം നടന്ന സമാപന സംഗമം ജില്ലാ പഞ്ചായത്ത്‌ മെമ്പർ നാസർ എസ്റ്റേറ്റ്മുക്ക്‌ ഉൽഘാടനം ചെയ്തു.കലോൽസവത്തിൽ പങ്കെടുത്ത മുഴുവൻ പ്രതിഭകൾക്കും ചടങ്ങിൽ വെച്ച്‌ ജില്ലാ പഞ്ചായത്ത്‌ മെമ്പർ ഉപഹാരങ്ങൾ കൈമാറി.താഹിറ വെളിമണ്ണ,ഇർഷാദ്‌ പുത്തൂർ,ബിന്ദു ടീച്ചർ ഓമശ്ശേരി എന്നിവർ സംസാരിച്ചു.
ഫോട്ടോ:ഓമശ്ശേരി പഞ്ചായത്ത്‌ ഭിന്നശേഷി കലോൽസവം (ആരവം-23) വെളിമണ്ണയിൽ പഞ്ചായത്ത്‌ പ്രസിഡണ്ട്‌ പി.അബ്ദുൽ നാസർ ഉൽഘാടനം ചെയ്യുന്നു.
Post a Comment