ഓമശ്ശേരി:
പഞ്ചായത്ത്‌ ഭരണസമിതി 2025-26 വാർഷിക പദ്ധതിയിലുൾപ്പെടുത്തി വെളിമണ്ണ യു.പി.സ്കൂളിൽ സംഘടിപ്പിച്ച ഭിന്നശേഷി കലോൽസവം (ഹൃദ്യം-25)ആവേശമായി.പഞ്ചായത്തിലെ 19 വാർഡുകളിൽ നിന്നുള്ള നൂറിൽ പരം ഭിന്നശേഷിക്കാർ പങ്കെടുത്ത ഏകദിന കലോൽസവം ഹൃദയസ്പർശിയായിരുന്നു.വ്യക്തിഗത ഇനങ്ങളും ഗ്രൂപ്പ്‌ പരിപാടികളുമായി സർഗ്ഗവസന്തം വിരിഞ്ഞ ഒരു പകൽ നവ്യാനുഭവമായി മാറി.ആടിയും പാടിയും മണവാളനായും മണവാട്ടിയായും വിദ്യാർത്ഥികളും മുതിർന്നവരും അരങ്ങ്‌ തകർത്തപ്പോൾ കാണികൾക്കത്‌ വിസ്മയമായിരുന്നു.ജനപ്രതിനിധികളും രക്ഷിതാക്കളും അങ്കണവാടി അധ്യാപികമാരും ഹെൽപർമാരും നാട്ടുകാരുമുൾപ്പടെ നൂറുകണക്കിനാളുകൾ തിങ്ങി നിറഞ്ഞ ശ്രോതാക്കളിൽ പുതുമയും ആവേശവും വിതറുന്നതായിരുന്നു ഭിന്നശേഷി കലോൽസവം.ഒപ്പനയും ഡാൻസും ആംഗ്യപ്പാട്ടുകളുമുൾപ്പടെയുള്ള കലാപരിപാടികളൊക്കെയും നിറഞ്ഞ കയ്യടികളോടെയാണ്‌ സദസ്സ്‌ വരവേറ്റത്‌.
രാവിലെ പഞ്ചായത്ത്‌ പ്രസിഡണ്ട്‌ കെ.കരുണാകരൻ മാസ്റ്റർ ഉൽഘാടനം ചെയ്തു.ക്ഷേമകാര്യ സ്റ്റാന്റിംഗ്‌ കമ്മിറ്റി ചെയർപേഴ്സൺ സീനത്ത്‌ തട്ടാഞ്ചേരി അദ്ധ്യക്ഷത വഹിച്ചു.ജില്ലാ പഞ്ചായത്ത്‌ മെമ്പർ നാസർ എസ്റ്റേറ്റ്മുക്ക്‌ മുഖ്യപ്രഭാഷണം നടത്തി.ആരോഗ്യ-വിദ്യാഭാസ സ്റ്റാന്റിംഗ്‌ കമ്മിറ്റി ചെയർമാൻ പി.കെ.ഗംഗാധരൻ,പഞ്ചായത്തംഗം പി.അബ്ദുൽ നാസർ,ഐ.സി.ഡി.എസ്‌.സൂപ്പർ വൈസർ പി.എം.പ്രിയ,വെളിമണ്ണ സ്കൂൾ പി.ടി.എ.പ്രസിഡണ്ട്‌ സർത്താജ്‌ അഹമ്മദ്‌,അബു ഓമശ്ശേരി,സ്പെഷ്യൽ എജ്യുക്കേറ്റർ സക്കീന,വിമൻസ്‌ ഫെസിലിറ്റേറ്റർ എൻ.വി.ശക്കീബ ശാഹിദ്‌,ഇസ്മായിൽ വെളിമണ്ണ എന്നിവർ സംസാരിച്ചു.
വൈകുന്നേരം നടന്ന സമാപന സംഗമം പഞ്ചായത്ത്‌ വികസന സ്റ്റാന്റിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി ഉൽഘാടനം ചെയ്തു.പഞ്ചായത്തംഗം ഒ.പി.സുഹറ അദ്ധ്യക്ഷത വഹിച്ചു.പരിപാടികളിൽ പങ്കെടുത്ത മുഴുവൻ ഭിന്നശേഷി പ്രതിഭകൾക്കും സമാപന ചടങ്ങിൽ പഞ്ചായത്തംഗം സി.എ.ആയിഷ ടീച്ചർ,'പരിവാർ' ജില്ലാ കോ-ഓർഡിനേറ്റർ കെ.അബ്ദുൽ ലത്വീഫ്‌ ഓമശ്ശേരി,റുഖിയ്യ ടീച്ചർ എന്നിവർ ഉപഹാരങ്ങൾ സമ്മാനിച്ചു.
ഫോട്ടോ:ഓമശ്ശേരി പഞ്ചായത്ത്‌ ഭിന്നശേഷി കലോൽസവം(ഹൃദ്യം-25) പഞ്ചായത്ത്‌ പ്രസിഡണ്ട്‌ കെ.കരുണാകരൻ മാസ്റ്റർ ഉൽഘാടനം ചെയ്യുന്നു.
Post a Comment